Sora Suling, Ngeclakeun Cai Mata

 

Carita Poe Ieu

Sora Suling

Geus dua bulan di masjid teh euweuh ketua DKM. Ketua DKM anu hebeul geus pindah ka derah lain. Dina hiji poe Ustad ngumpulkeun jamaah rek ngebentuk ketua DKM anu anyar. Dina riungan eta aya dua urang anu sanggup jadi ketua DKM. Pa Ustad nanya kanu hadir. Naha dina ngabetuk DKM  teh rek suara mufakat atawa rek dipilih langsung. Hasilna sarua antara anu hayang suara mufakat jeung anu hayang dipilih langsung. Pa Ustad bingung. Keur kitu aya tokoh anu ngomong.

“Pa Ustad kumargi kahoyong jamaah sami seueurna, ayeuna mah mangga kuma Pa Ustad.”

“Cing ka para jamaah, satuju lamun pemeilhan DKM carana kumaha abdi?” Ceuk Pa Ustad.

“Satuju.......” Ceuk jamaah serempak.

“Nya lamun satuju sadayana mah, ku abdi bade dilaksanakeun. Cing saha anu dibumina gaduh suling?”

Kabeh jamaah rurat-reret. bari silih tanya, naon hubungannana pemilihan DKM jeung suling. Tapi jamaah teu wani nanyakeun ka Pa Ustad. Aya we anu ngajawab.

“Abdi  Pa Ustad gaduh suling.”

“Tiasa niupna?”

“Tiasa.”

“Sok atuh candak kedieu.”

Suling geus aya. Pa Ustad nitah dua urang jalma anu siap jadi ketua DKM sholat sunat dua rakaat. Anu boga suling dititah niup suling salila dua calon keur sholat sunat. Suling ngagelik. Anu ngadenge ampir kabeh ngeclakkeun cai mata. Beres anu sholat, beres anu nyuling. Pa Ustad nanya ka calon kahiji.

“Bapa kadangu sora suling?”

“Pa Ustad abdi teu terang aya anu nyuling. Abdi teu ngadangu sora suling. Panginten bakat ku khusu abdi sholat.”

“Muhun.” saur pa Ustad pondok. Terus Pa Ustad nanya kanu hiji deui.

“Bapa basa nuju sholat kadangu sora suling.”

“Muhun, Pa Ustad abdi ngadangu sora suling.”

“Tah ieu anu jadi ketua DKM.” Ceuk Pa Ustad. Atuh kabeh jamaah rungah-ringeh.

 

Sardun Tabayun, Sukasari 3 April 2019

Sumber Carita, Ki Lanceuk.