Aya Kembangan

 

Carita Poe Ieu

Aya Kembangan

         Teu kitu kumaha, da duanana kaciri karuat. Duanana tukang olah raga. Jarago béla diri. Atuh puguh tanagana ogé baredas pisan. Dina prungna bérés pangantenan teu antaparah kabeh jurus digunakeun. Hut-hét. Késang ngaragajag. Sora ranjang rerekétan ogé geus teu ditolih. Kagog ceunah keur padungdung. Beuki lila beuki angot anu hut-hét. Ranjang geus teu bisa nahan. Gubrag wé ranjang ngagubrag. Pangantén reuwas, mitoha ogé reuwas. Da sidik sora ngabubrag ranjang roboh téh tarik. “Ujang!!!.... Nyai!!!... aya naon?” Ceuk mitoha bari ngetrok panto kamar.

         Pangantén reuwas. Gewat pahibut néangan pakéan anu masing-masing. Lieuk ka juru wetan euweuh. Ka juru kidul, kulon, kalér kitu deui teu katinggali. Bari mitoha lalaki jeung awéwé terus ngetrokan panto kamar dan sieun aya nanaon. Pangantén bingung. Néangan baju sapuratina acan waé kapanggih. Duanana ukur bisa rutrét bari bingung. Bantal disingkabkeun, euweuh. Simbut diambrulkeun euweuh. Luha-loho ka handapeun ranjang anu geus ambruk. Goréhél aya pakéan. Teu antaparah, rap waé dipaké ku masing-masing.

         Geus rada tenang, pangantén awéwé muka panto kamar, dan Indung jeung Bapana geus nungguan di luar panto kamar. Hariwang bisi aya naon-naon. Panto bray dibuka. Mitoha blus wé ka kamar. bari hariweusweus nanya.

“Nyai, Ujang aya naon, aya sora ngagubrag, naha aya bangsat ti para?”

“Teu aya nanaon, Ambu! Sora anu tadi mah Si Aa keur ngoméan ranjang anu reyod, tuh ningan masih kénéh dilereskeun.” Ceuk Si Nyai bari rada kuram-kireum.

“Ari éta naha, Nyai maké sarung si Ujang. Si Ujang maké samping Nyai?” Pangantén reuwas, barang ditinggali enya pahili. Ma’lum keur ribut, teu sadar. Pangantén olohok teu bisa ngajawab.

“Ari itu kutang saha anu nyansang dina lomari.” Si Nyai beuki teu bisa ngajawab. Pipi katinggali beureum bakat ku éra.

“Ari itu deuih selempak saha gigireun lomari?” Ayeuna giliran Si Ujang. Kitu deui Si Ujang ukur bisa ngarérét bari teu bisa ngajawab.

         Mitoha lalaki surti, yén anak jeung minantuna geus ngojay bari motah. Mitoha lalaki ngajak mitoha awéwé ninggalkeun kamar. Pangantén buru-buru nutupkeun jeung nulakan deui panto kamar. Pangantén silih rérét, terus sareuri, bakat ku era ku kolot.

         Ranjang dibéréskeun deui. Pangantén ngagoléhé deui. Karék ogé ngagoléhé, panganten lalaki nanya rada tarik.

“Nyai, naha selempak anu Aa aya kembangan?”

“Duka atuh Aa. Cing buka!”

Barang dibuka, énya wé selempak Si Ujang pahili jeung anu Si Nyai.

 

Sardun Tabayun, Mekarsari 22 Januari 2019

Sumber carita moasl dibeja-beja.